BREAKING NEWS: សម្តេចតេជោអំពាវនាវឲ្យពលរដ្ឋទៅចាក់វ៉ាក់សាំងដូសជំរុញ ក្រោយរកឃើញករណីឆ្លងអូមីក្រុងក្នុងសហគមន៍ ១០ករណីបន្ថែមទៀត
ភ្នំពេញ៖ នាយករដ្ឋមន្រ្តីកម្ពុជា សម្តេចតេជោ ហ៊ុន សែន បានថ្លែងថា នៅថ្ងៃនេះកម្ពុជារកឃើញករណីឆ្លងអូមីក្រុងចំនួន ៣៤ ករណីបន្ថែមទៀតក្នុងនោះ ១០ករណី ជាករណីក្នុងសហគមន៍។
ថ្លែងតាមរយៈសារសំឡេងមានរយៈពេល ៨ នាទី សម្តេចតេជោ បានលើកឡើងថា វិធានការចាំបាច់នាពេលនេះគឺ ៣កុំ ៣ការពារ និងជំរុញល្បឿននៃការចាក់វ៉ាក់សាំងដូសជំរុញដើម្បីធានាថាសហគមន៍មានភាពរឹងមាំ។
សម្តេចក៏បានបញ្ជាក់ផងដែរថា៖ «គណៈកម្មការចំពោះកិច្ចសម្រាប់ការចាក់វ៉ាក់សាំងបានចែកជូនវ៉ាក់សាំងទៅតាមបណ្ដាខេត្តរួចទៅហើយដែរ ។ [...] វ៉ាក់សាំងប្រភេទណាក៏ដោយតម្រូវការបញ្ហាសំខាន់គឺត្រូវមានគ្រប់គ្រាន់ដើម្បីចាក់ បន្ថែមលើនោះអ្វីដែលសំខាន់ជាងគេនោះគឺ អាជ្ញាធរគ្រប់លំដាប់ថ្នាក់ត្រូវតែពង្រឹង និងយកចិត្តទុកដាក់ទៅលើការប្រមូលមនុស្សមកចាក់ឲ្យបានគ្រប់ៗគ្នាដែលដូសជំរុញដើម្បីជាវិធានការទប់ស្កាត់ជាមួយនឹង មេរោគបំប្លែងថ្មីនេះ»។
ទោះបីយ៉ាងណាក៏ដោយសម្តេចក៏បានបញ្ជាក់ថា លក្ខខណ្ឌនៃការទទួលបានដូសទីបីគឺត្រូវតែជាលក្ខខណ្ឌដែលអនុវត្តទៅតាមស្តង់ដារសុខាភិបាលដែលបានបញ្ជាក់ គឺបួនខែក្រោយពីទទួលដូសទីពីរ បើមិនទាន់បានបួនខែទេគឺអាជ្ញាធរសុខាភិបាលឬគ្រូពេទ្យ នឹងមិនទទួលចាក់ជូនទេព្រោះមិនធានានូវសុវត្ថិភាព។
គួរបញ្ជាក់ផងដែរថា គិតមកត្រឹមពេលនេះប្រទេសកម្ពុជាបានរកឃើញករណីឆ្លងកូវីដ-១៩ បំលែងខ្លួនថ្មីអូមីក្រុង ក្នុងសហគមន៍ចំនួន ១៤ករណីហើយ៕